圓方商場

對於讀chem既人黎講，「圓方」係個聖地
圓方商場英文名叫Elements，化學元素也
我地相信向「化學元素」朝拜可以得到保佑
受過保佑就能夠係quiz考試中「勁過」
對一切法術/技能/普攻免疫
就如Noble Gas一樣stable
所以讀chem既人一世人點都要去一次呢個聖地

今日搭MTR去左呢個聖地
但原來搭地鐵去九龍站係最慢
最快係搭MTR再轉巴士/小巴，或者搭小巴
如位置許可，搭巴士最好，唔洗轉車
商場樓下有215X，11，203E等等既巴士
仲有去旺角同土瓜灣既綠巴，當然亦有的士

上到去，唔係太多人，亦冇大大個牌寫住個商場名
唔理三七廿一，拿份地圖睇下先......
原來係D高級商場，D商舖賣D野好唔平民化
一個筆筒$65......爽死= ="
都有一間野正常既，HMV，聽左一陣歌
D headphone好新，耳錦同條線都一樣好新好新
原來間間HMV都係果隻headphone，冇新意／．＼
講起headphone，CD Warehouse果D真係唔知想點
我去過三間，得一間D headphone係似樣既
又一城間HK Records肯用AKG，雖然只係K44
但總好過用D百幾蚊既philips野丫！
重音染，冇層次，冇動感，有雜音，冇味道
CD Warehouse最需要改善就係佢俾人試既裝備
因為佢D headphone，去左兩/三次就唔想再去

係HMV到見到Pavarotti既新專輯，即刻試下...
唉，等到人地香左先黎嚐試欣賞佢，真係無奈
如果我早幾年出世就好～
會唔會買佢？我諗唔會，最憎D發死人財既人！
伊麵貓：無錢就無錢啦，死撐！
伊麵丹：冇錢？咁果張10蚊係乜黎！？
伊麵貓：弊在你就係得返張10蚊！
伊麵丹：「貓」頭鍘伺候！
伊麵貓：有人惱羞成怒呀！.....( 切吔！ )

其他設施有溜冰場，一D古怪食肆、精品店
整體上個商場真係細，不過都正常，淨係第一期
將來有埋二、三、四、五、六期先再算
就好似Periodic Table of Elements咁...
咁多Periods同Groups唔係一日就可以整成！

係HMV門口出面，有班友仔係到玩樂器
但好無奈地周圍D人只係坐係到瞓覺，美妙既音樂只係淪為催眠曲而已
香港人究竟係點睇音樂？人地努力不懈既練習，企係到玩樂器玩咁耐
你地？瞓覺！香港人真係唔多識欣賞身邊既事物
我企左係到聽呀聽，影呀影，見到D人個個都掂行掂過，冇注意過佢地
我可能對呢D野敏感，行到聽到D樂器聲就已經好精神
接近熱血沸騰，但就係因為D咁有質素既群眾，攪到冇曬聽歌既氣氛！
不知所謂！