都係打返篇野好

最近幾堂中化，因為太悶既關係
自己睇曬篇課文( 我好少會咁乖 )
今日要分組匯報一下對下面條題目既見解
『香港人係咪有「閉固性人格」(註#)』
加上返到屋企睇到新鮮仔篇「借題發揮【詩禮全家】!」
有感而發，雖然係新鮮仔到留左言
不過都係想詳述一下

中代中國政治從來唔係平民百姓既事
世俗壓力( 例如孔儒思想 )迫人安守本份
謙讓得將所有同自身有關既權力都交曬出去
耕田既真係耕足一世田
讀書既真係讀足一世書
尤幸承傳下一代既傳統束縛幾乎煙消雲散
如果唔係社會唔會有進步
當然，有D傳統既承傳係好有價值
例如深水埗劉森記既竹昇麵，有著連起源地都冇咁既傳統同美味
現代香港，看似係高新科技思維文明集一身既發達地區
但香港人骨子裡依然有著封建社會腐敗既影子

諗返幾年前既七‧一遊行
五十萬人上街，為既野有好多
各方人馬表達各種聲音
之後，董生落台，唐老鴨上陣
一直名聲唔錯既唐老鴨做特首
開頭冇乜做錯野，但亦都冇乜做好野
我地既訴求唔係淨係想換個人，係換一個施政既領導
換左領導，亦都要繼續監察政府
所謂監察唔係有事先黎吹雞
係睇實佢唔好俾佢亂黎
但係董生一下台，民憤好似完全平息曬咁
最近唐老講錯野，玩錯野
又唔見大家攪大佢？
反而多左既係中學生上街鬧考評局
反而連無知學生哥都夠薑過D大人們！

近兩年七‧一，陳太落埋場，貌似增強士氣
難聽D講係為立法會補選做show，借遊行示威過橋
E+ 08年，立法會選舉，到E+都好似冇咩聲氣
我淨係見過黃毓民上個禮拜六係旺角攪講壇
講題主要係爭取普選
我諗普選應該大件事過八萬五、廿三條
事關只要有個好特首，呢D問題根本唔係問題
但做乜...好似有人講呢D野又冇人點理呢D野
我諗今年立會選舉應該都係普選為大事
反而派錢黨問題先至攪到風波出來
係咪錢可以重要過普選咁大獲呀？
政治取向係咪連果D零錢都及唔上呀？
再好似古人咁唔嗲唔釣，政治冷感甚至聞政治色變
社會唔會有進步架！

註#：有代表性既句子：各家自掃門前雪，哪管他人瓦上霜
唔殺到埋身、同自身利害無關者一律不理
大概就係閉固性人格